Clientenan mester a pega dos ticket no-ganado na otro, skirbi nan nomber, fam, adres y number di telefon tras di tur dos ticket y deposita nan den e caha special poni cerca rebendedonan of na oficinanan principal di Lotto. E weganan cu a participa e biaha aki tabata Cachi Cachi, Pot O’Gold, Lucky Stars, In The Chips y Aces High.

Dialuna durante sorteo di merdia, Lotto a anuncia e feliz ganadonan: Tercer premio a bay T.M. Geerman di Wara-Wara 29, kende a gana un microwave oven; e di dos premio, esta un stoof, a wordo gana pa M. Tromp di Bushiri 160; y prome premio a bay pa Carlton Geerman di Macuarima 27-B, a bira doño di un bunita frigidair inverter.

Lotto ta felicita e ganadonan y ta corda tur cliente pa no benta nan ticketnan no-ganado di Raspa y Gana afo, pasobra na diferente ocacion lo tin campaña extra cu premionan cu di berdad ta “bale la pena”.