Durante e conferencia di prensa na e ‘Store’ nobo di Lotto, e periodistanan presente a participa como e prome hungadonan di e wega promocional aki. Cu nan prome ticket den man, nos miembro nan di prensa lo ta algun di e varios hungadonan cu lo sintonisa e prome sorteo di “Tic-Tac-Toe” den un studio completamente nobo na TeleAruba tur anochi pa 9’or pm y diadumingo pa 2’or di atardi. “Tic-Tac-Toe” ta un wega hopi dibertido pa bo hunga cu bo famia y amigonan! E ta un wega cu bo por hunga den un ambiente hopi alegre, ademas di pasa pret bo lo tin chens di gana premio. “Tic-Tac-Toe” ta costa solamente 2 florin y ta bini den forma di 9 number. E hungado mester compara e numbernan riba e ticket cu esunnan cu ta sali den sorteo.
Cu 7 number bo por forma di 1 te cu 5 liña pa gana. Entre mas liña bo forma, mas bo ta gana! E ticket cu bo cumpra ta bin cu e numbernan cla caba. Bo no ta scoge bo mesun numbernan, pues e mesun sistema cu Lotto Loco. E premionan di “Tic-Tac-Toe” ta hopi interesante. Asina e hungado cuminsa forma liña, e ta gana. Pa un liña, e hungado ta gana un ticket gratis. Na momento cu logra forma 2 liña, ta gana Afl. 5,=. Ora forma 3 liña ta gana Afl. 50,=, ora tin 4 liña forma, Lotto ta paga Afl. 500,= y si logra forma 5 liña riba un solo ticket, e premio ta e jackpot di dia! Lotto, e loteria di Aruba cu 7 diferente wega; Catochi, Big 4, Zodiac, Lotto di Dia, Lotto 5, Mini Mega y Wega di Number Korsou, ta corda un y tur pa sigui purba nan suerte cu cualkier di 7 weganan aki na cualkier rebendedo di nan preferencia, ya cu kisas abo por ta e siguiente ganado feliz.
Alabes cumprando Lotto bo ta contribui tambe na deporte riba nos isla. Lotto di Aruba ta existi desde aña 1982 caba y apenas algun luna atras ora cu a presenta nan imagen nobo, Lotto a haci entrega di un donacion adicional di 1 miyon dollar na e Comision di Subsidio di deporte, kende na su turno ta percura pa e fondonan ey yega na e organisacionnan di deporte. Meta di e fundacion ta pa organisa loteria, cambia bida di su ganadonan y na mes momento, inverti den deporte local.
{gallery}joomgallery/originals/tic_tac_toe_press_14{/gallery}
