Awor si e check di 500 mil florin a haya un nomber y cara, ya cu e dama Rubiano Nelida Gonzalez, di apenas 24 aña, a yega oficina di Lotto hunto su mama pa ricibi e check. Nelida tabata un poco nervioso, pero sigur super entusiasma pa busca su check, cu e la gana di dos siman pasa diabierna, 31 di augustus ultimo, cu numbernan: 17, 19, 25, 30 y e Mega Ball 10. Semper Nelida ta laga su mama of tata cumpra e numbernan p’e, y ta trata di e numbernan fiho cu e ta hunga, desde basta tempo caba.

Ta su propio mama mes a yega di cumpra un number loco p’e y desde e tempo ey, el a keda uza e numbernan loco ey pa hunga su Mini Mega tur biaha. Nelida nunca por a pensa cu cumprando un biaha mas su numbernan ey na Lucky Angel, por a dun’e e resultado tan desea. El a baha check e ticket, pa sa si e por a gana algo y ora nan a bis’e cu el a gana e 500 mil florin, e no por a kere y a pensa cu ta un joke nan ta haciendo cu ne. Nelida a drenta su auto y no a bisa su mama net nada, te ora cu nan a yega cas, el a dicidi di bis’e cu nan tin e ticket ganado di Mini Mega su mey miyon florin. “Semper hende sa bisa cu Lotto ta hopi dificil pa gana of casi imposibel, pero obviamente cu esey no ta berdad,” tabata su palabranan. Ya Nelida a cuminsa core rond pa wak e cas di su soño, cu sigur lo bira un realidad awo, danki na Lotto, e loteria di Aruba. “Tambe mi lo disfruta di un poco shopping”, e feliz ganadora a expresa cu un smile riba su cara.

Lotto kier recorda un y tur pa no lubida riba nan otro weganan; Catochi, Big 4, Zodiac, Lotto di Dia, Lotto 5, Mini Mega y Wega di Number Korsou, pasobra cu cada compra bo ta contribui na deporte riba nos isla. Lotto di Aruba ta existi desde aña 1983 caba y apenas algun luna atras ora cu a presenta nan imagen nobo, Lotto a haci entrega di un donacion adicional di 1 miyon dollar na e Comision di Subsidio di deporte, kende na su turno ta percura pa e fondonan ey yega na e organisacionnan di deporte. Meta di e fundacion ta pa organisa loteria, cambia bida di su ganadonan y na mes momento, inverti den deporte local. Y awor durante henter luna di September bo ta haya extra chens pa gana Afl.1000,- tur dia cu Big 4, Catochi of Wega di Number Korsou. Yena bo cartera cu un Cachi Cachi! Riba e foto adhunto por aprecia e ganado feliz, Nelida Gonzales, cu e check grandi di 500 mil florin cu sigur ta bay haci varios di su soñonan realidad.