ORANJESTAD, Aruba - 27 di januari, 2016: E federacion di pesas, AAWA a organisa su prome torneo di anja 2016, Copa Betico Croes. Diadomingo ultimo y bou di un expectativa grandi e torneo a tuma luga den Centro Deportivo Frans Figaroa na Noord. Mirando e cantidad di participacion di e gymnan y organisacionnan di crossfit manera Muscle&Lungs Crossfit Aruba, Crossfit A297, Barbells in ParadiseCrossfit, CrossfitGradum y TNT Gym por bisa cu esaki tabata uno sumamente exitoso pa e organisadornan. Na banda di e participacion mester bisa cu e prestacion tabata uno sublime mirando cu varios participante a logra mehora nan record personal, algun hasta drecha esnan nacional, esaki sigur tabata un adelanto mirando e sacrificio cu cada un ta bin ta haci pa asina hiba e deporte di pesas na un otro nivel.
Den e categoria 53kg femenino, e prome luga a bay pa Shauni Mathilda, e di dos luga pa Stephanie Montoya. Den 69kg, e prome luga a bay pa Amanda Curly y e di dos luga pa Christy Rodriquez, mientras den 75kg, e prome luga a bay pa Rachel Werleman y di dos luga pa Amanda Westera. Den e categoria masculino den 62kg, e prome luga a bay pa Yosef Mousalli, den 69kg, Gerswin Javois ta keda na di prome luga. Den categoría di 77kg, e prome luga a bay pa William Erasmus, e di dos a bay pa Guillermo Londoño, mientras den 85kg, e prome luga a bay pa James Alzate Polanco, e di dos luga a bay pa Santiago Bueno. Pa loke ta e categoria di 94kg, e prome luga a bay pa Jetsen Richardson, mientras den e categoria di 105kg, e prome lugar a bay pa Joel Kuiperi y e di dos luga a bay pa Leroy de Vries.
Un danki sigur na Lotto, E Loteria di Aruba pa medio di Comision di Subsidio cu a subsidia e competencia di pesas riba Dia di Betico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
