ORANJESTAD, Aruba - 5 di januari, 2016: Un bes mas e deporte di bowling di Aruba a sa na saca cara di nos dushi isla den exterior. Recientemente un delegacion hubenil di bowling den e categorianan U-15 y U-20 a biaha pa San Juan, Puerto Rico unda nan a competi den e torneo Caribeño Paradise Kids Jose Luis Carde 2015. Mester cu e bolicheronan hubenil a sa na destaca den bon forma durante di e torneo unda nos hobennan a sa na conkista un segundo luga overall den U-15 y U-20.
E ekipo di Aruba tabata basta consistente unda a enfrenta e miho hungadonan di Puerto Rico den e categorianan menciona. Pa loke ta e weganan individual Aruba a sa na cay den premiacion den tur categoria. Den U-12, e hobencita Rania Halabi porcierto debutante den un torneo internacional a logra un di tres luga den e categoria femenino. Den U 15, Jair Kelly a keda na di tres lugar mientras den U 20 femenino, Shakaina Querero a logra conkista un prome luga den su categoria mescos cu Renald Thiel kende tambe a logra un prome luga den U-20 masculino lagando Elias Halabi di Aruba na di dos luga pa un pin.
E deporte di bowling ta conta cu un elenco hubenil fuerte, e mayoria ta prospectonan cu por logra cosnan grandi pa Aruba den torneonan renombra. Mas cu claro mester gradici e federacion di bowling, ARBAS hunto cu e staf di coachnan como tambe e mayornan cu ta contribui grandemente na e exito aki. Un pabien sigur na e delegacion di bowling pa nan tremendo presentacion na Puerto Rico.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di Aruba pa e torneo internacional Caribeño Paradise Kids Jose Luis Carde 2015 na Puerto Rico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
