ORANJESTAD, Aruba - 30 di november, 2015: Diahuebs anochi e ekipo di Steelers Billiard Team a demostra cu un bes mas nan ta e miho ekipo cu ta hunga bola 8 na Aruba den e deporte di biyar. Pa di dos aña consecutivo nan ta titula campeon di e FEBIAR 8 ball team. Den e prome wega di final den e serie di “best out of three” contra di e ekipo di Pizza Hut Predators, porcierto e mesun finalistanan di aña pasa e ekipo di Steelers a sa na remonta despues di tabata perdi 3 – 1 y bin gana toch na final cu e score preta di 5 - 4.

Pa su mañan diabierna e ekipo di Steelers a bin dicidido unda nan ta logra un otro victoria preta di 5 – 4 y automaticamente e titulo di campeon como e miho ekipo di Aruba den bola 8. Lotto, e loteria di Aruba cu pa medio di Comision di Subsidio ta apoya e deporte di biyar y kier a felicita e ekipo di Steelers y Pizza Hut cu nan titulo di campeon y sub – campeon di bola 8 den biyar. E torneo di bola 8 tabata e ultimo di e federacion di FEBIAR pa loke ta e temporada 2015. Dia 5 di december proximo lo tin entrega di e trofeo na Classic Billiard.

Un danki sigur na Lotto, e Loteria di Aruba pa medio di Comision di Subsidio cu a subsidia e competencia di bola 8 organisa pa e federacion di biyar Arubano, FEBIAR
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.