ORANESTAD, Aruba – 16 di november, 2015: Ya pa di 7 aña consecutivo e scol den e deporte di arte marcial Tiger Taekwondo Academy ta organisa su torneo anual Taekwondo Open Championship Torneo de Colores. Un campeonato cu cada aña tin su acohida mirando cu e ta uno di nivel internacional y e aña aki lo conta cu participacion di atletanan for di entre otro Republica Dominicana, Venezuela y Aruba mes. E fecha lo ta 28 di november proximo mientras cu Centro di Bario y Deporte Dakota lo ta e cas di e torneo aki. Lo bay tin varios combate interesante pa mira mientras Aruba su atletanan ta cla pa bataya contra di esunnan di exterior.

E deporte di taekwondo ta uno super popular tin un total di 14 scol di taekwondo di cual 12 ta activo den casi tur districto na Aruba. Bo ta haya clubnan manera Brazil TKW, Noord TWK, Tiger TKW, Washington TKW, Crotalus TKW, San Nicolas TKW, Estrella TKW,Aruba TKW Institute, Aruba TKW Dojang, Elite TKW y Golden Glory. Numeroso mucha ta practica e deporte aki mientras na nivel internacional nos a logra triunfo cu medaya den varios torneonan grandi cu entre otro atletanan elite manera Stuart Smit, Aishel van der Linden, Monica Pimentel y John Jairo Maduro, sin lubida esunnan mas hoben cu ta e rumannan Sophia y Chiara Petrrochi. No por keda sin menciona e trabou duro cu e federacion di taekwondo, ARTBO ta bin ta haci na bienestar di e desaroyo positivo di tur su miembronan.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e torno anual Taekwondo Open Championship Torneo de Colores.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.