ORANJESTAD, Aruba - 16 di november, 2015: Recientemente e federacion di esgrima Arubano, SABA a organisa un competencia di esgrima bou nomber di Dutch Caribbean Championship 2015. Mester bisa cu for di nos hermana isla di Corsou un delegacion kendenan a bini pa e competencia menciona. E competencia tabata tin un duracion di dos dia unda a wordo competi den e categorianan di degen y floret.

Den e ultimo añanan e deporte di esgrima, cual ta un deporte Olimpico a bira masha popular unda mas y mas persona ta bira miembro di un club di esgrima. Principalmente nos hobennan a cuminsa mustra interes den e deporte di spada. Notabel ta cu nos atletanan di esgrima a cuminsa na competi riba plataforma internacional den nos region cual ta un muestra cu e disciplina, dedicacion y boluntad pa logra lo maximo t’ey.

E resultadonan di e Dutch Caribbean ta como lo siguiente. Riba e prome dia a inicia e evento cu e competencia di Degen nos ta haya mucha muhe 8 - 10 aña Nikiana Thompson, mucha homber 8 - 10 aña Clifton Valle, mucha muhe 11 - 13 aña Rebecca Noguera, mucha homber 11 - 13 aña Reginald de Palm, mucha muher 14 - 17 aña Eugenie Clark, mucha homber Xavier Lionaron, mucha muher 18 - 19 aña Tirslain Jansen. Pa su mañan diadomingo a sigui cu e competencia den e evento di Floret. Aki nos ta haya mucha muhe floret 11/13 Schawndrella Blanco, mucha homber floret 8/10 Clifton Walle, mucha muhe floret 14/17 Eugenie Clark, mucha muhe floret 18/19, mucha homber 14/17 Kevin Hernandez, Senior floret homber Sean Maria, Sabel Senior masculino Andre Alias, Sabel dama Tirslain Jansen.

Un danki sigur na Lotto, e Loteria di Aruba pa medio di Comision di Subsidio cu a subsidia e competencia di Dutch Caribbean Championship den esgrima organisa pa Scherm Amateur Bond Aruba.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.