ORANJESTAD, Aruba - 11 di november, 2015: Recientemente Aruba Triathlon Association a tene su Off Road Triathlon esaki na Arashi Beach. E Off Road Triatlon Nacional tabata uno cu e ser teni den e categorianan di mucha y adulto mientras por a bay den ekipo di relevo. Mester bisa cu e participacion tabata grandi unda un gran cantidad di tri-atleta den tur edad a bin participa na e evento aki. Tabata tin un recorido cortico unda mester a landa 350 m, core bais 7 km y core na pia 2.2. km. E distancia completo tabata landa 700 m, core bais 14 km y core na pia 4.4. km.

Pa practica tres disciplina di deporte na e mesun momento no ta facil, e landamento riba cierto distancia den awa ya caba ta uno pisa, e recorido riba bicicleta cu ta sigui despues semper ta esun di mas largo y por ultimo coremento na pia riba un distancia di algun kilometer ta esun di mas pisa sigur despues cu bo a caba di eherce e otro dos prome. Den e ultimo añanan, Aruba Triathlon Association a encurasha varios atleta pa practica e deporte aki. Actualmente ATA ta trahando duro cu algun bon prospecto caminda ta bishita varios competencia den exterior esaki di Kids, Junior como tambe Elite y mayoria biaha ta logra exito.

Un danki sigur na Lotto, e Loteria di Aruba cu pa medio di Comision di Subsidio a subsidia e competencia di Off Road Triathlon.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.