ORANJESTAD, Aruba - 11 di november, 2015: E campeonato di Febiar a yega su etapa final pa loke ta e APT Division A y Division B. Den e siman cu a pasa e ultimo weganan a wordo hunga pa asina mira ken lo bira e ganadonan den ambos division. Un total di 24 hungado a forma parti di e campeonato di cual 16 den B y 8 den A.

Pa loke ta e division A, tin cu bisa cu despues di un fuerte bataya entre Wolff, Rampesaud y Leonard unda tur tres tabata basta cerca di otro den puntuacion, e hungado Richard Wolff a bira e ganado den A cu un total di 760 punto sigui pa Ryan Rampesaud cu 700 y Gunnard Leonard cu 685. Den e division B e ganado absoluto a bira Ransley Tromp cu 620 punto sigui pa Fredly Tromp 585 y Alan van Aanholt cu 565. Tanto Ransley y Fredly lo promove pa division A.

E federacion di biyar sigur por mira tras di un APT exitoso. Lotto, e loteria di Aruba ta aplaudi e trabou duro cu e federacion ta bin ta haci e ultimo añanan pa nan atletanan. E deporte di biyar varios biaha a representa Aruba den torneonan internacional renombra y cu exito. Un pabien sigur na e federacion di FEBIAR pa e exitoso campeonato.

Un danki sigur na Lotto, e Loteria di Aruba pa medio di Comision di Subsidio cu a subsidia e campeonato di Aruba Pool Tour 2015 organisa pa e federacion di biyar, FEBIAR.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.