ORANJESTAD, Aruba - 11 di november, 2015: Den e weekend tras di lomba Aruba Basketball Bond a inicia cu su campeonato di basketball den e diferente categorian. E aña aki e lema di e federacion ta “We are Basketball”, un lema cu e federacion mundial di basketball FIBA tambe ta uza mundialmente pa haci promocion pa e deporte. E ceremonia di apertura a tuma luga den e compleho deportivo di Aruba Jrs na Playa.

E aña aki lo tin competencia den e categorianan di Pee Wee cu ta e mas chikitonan (u10), tambe den e categoria di Mini (u13), sigui pa e categoria di Paserela (u15), mientras cu despues bo ta haya e categorianan mas grandi esta Cadet(u17) como tambe Junioren(u19). Manera tur aña, e federacion di basketball ta dedica e campeonato na un persona kende pa hopi aña a duna su contribucion na e desaroyo di e deporte den su totalidad. E biaha aki a dedica e campeonato na e conocido referee di basketball sr. Andy Young, un escogencia sigur na su luga. Actualmente Sr. Young ta forma parti di e Cuerpo Tecnico di Referee y Mesa.

Ta masha importante pa duna e sosten necesario na nos federacionnan deportivo cu tin hopi atletanan ta guia tur dia. Muchanan ta wordo motiva pa practica deporte y esaki sigur ta algo tremendo pa no solamente e mucha mes y su deporte cu e ta practica sino pa e comunidad completo. Mas mucha den movecion sano, miho ciudadano so e por bira despues.

Un danki sigur na Lotto, e Loteria di Aruba pa medio di Comision di Subsidio cu a subsidia e campeonato di basketball organisa pa e federacion di basketball Arubano, A.B.B.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.