ORANJESTAD, Aruba - 4 di november, 2015: Den e fin di siman tras di lomba e deporte di karate tabata activo pa loke ta nan participacion den e competencianan internacional tanto na Corsou como na Venezuela. E scolnan di karate Dojo Budokan, Dojo Shibumi y Dojo Shoshinkai a biaha cu un delegacion pa Valencia, Venezuela unda nan a competi den e di 6 edicion di e torneo internacional “Copa Internacional Dojo Moncada”.

E compleho deportivo bicentenario di Naguanagua tabata e anfitrion di tur e combatenan. Paisnan presente na e torneo tabata Aruba, Panama, Colombia y mas cu claro Venezuela mes. E torneo ta uno cu participacion masal y e meta mas grandi ta pa purba di motiva mas mucha cu ta posibel participa na e deporte di karate y tambe pa conoce atletanan di otro pais y mira ta con nan nivel ta den e deporte di arte marcial.

E atletanan cu a competi na Venezuela ta di Dojo Budokan Amelia Dubero, Sebastian Dubero, John Ospino, Rayn Rangel, Catherine Carraha hunto cu masters Alejandro Gonzales, tambe nos ta haya di Doho Shibumi e atleta Catherine Carah hunto cu masters George Carah y por ultimo Dojo Shoshinkai cu Robert Silva. Mester bisa cu e deporte di karate na Aruba ta den pleno desaroyo, pa aña varios torneo ta wordo organisa door di e federacion pa e clubnan miembro, mientras competencianan internacional ta wordo atende pa nan atletanan tanto na nivel di club como di seleccion.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atletanan di karate pa e “VI Copa Internacional Dojo Moncada” na Valencia, Venezuela.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.