ORANJESTAD, Aruba - 4 di november, 2015: Despues cu Aruba Judo Bond a anuncia e serie di actividad cu e conocido judoka Hulandes, Denny Meeuwsen celebrando asina e di 5 aniversario di World Judo Day, e entusiasmo tabata grandi principalmente na e scolnan cu e judoka Meeuwsen a bishita.

Durante dos dia largo, e judoka Meeuwsen hunto cu e atleta Olimpico Arubano, Fiderd Vis a bishita e scolnan basico Graf von Zinzendorf como tambe scol basico Mon Plaisir unda nan a siña alumnonan di dicho scol e diferente tecniconan di judo. Mester bisa cu ambos scol a aprecia e gesto di Aruba Judo Bond y mas cu claro awo ta spera cu mas y mas mucha lo ta motiva pa practica e deporte di judo, cual sigur tabata un di e metanan di e federacion di judo. Na banda di e dos scolnan e dos dianan di entrenamento y instruccion na nos atletanan di judo como tambe na nos coachnan a haya un acogida grandi. Esakinan sigur a haya hopi tipnan valioso y sigur a amplia nan conocemento un poco mas.

Lotto, e Loteria di Aruba pa medio di Comision di Subsidio cu a subsidia e serie di actividad organisa pa Aruba Judo Bond ta manda un palabra di pabien na e federacion cu e tremendo iniciativa pa organisa e actividad cu e atleta Denny Meeuwsen.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.