ORANJESTAD - Aruba 3 di november, 2015. Recientemente e federacion ciclismo, seccion BMX a participa den dos competencia na Florida, Merca unda nan core den dos evento renombra. Mester bisa cu ambos careda a bay den bon forma pa e cuater atletanan Zaithyel y Zyqion Soekandar, Jaymer Carolina y Shamil Figaroa. E prome evento cu a wordo cori tabata e Gator Nationals Supercross Series na Olsmar, Florida mientras su siguiente siman nan a biaha pa Orlando, Florida, unda nan a competi den e Disney Cup Fall Nationals.
Pa loke ta e resultadonan nos tin cu bisa cu diabierna den e Copa Gator Nationals nos haya Zaithyel Soekandar a logra un prome luga den experto 17-18, Zyqion Soekandar a logra un prome luga den su categoria y ocho luga den e Super X, Shamil Figaroa a logra un di tres luga den e Open y Jaymer Carolina a logra un di dos luga den e Open y un di tres luga den e categoria 17-18 experto. Riba diasabra e caredanan a continua unda Jaymer Carolina a logra yega prome den e Open y semi final den categoria 17-18 experto, mientras Zyqion Soekandar ta logra un di tres luga den e Super X y un prome luga den experto 16 aña, tambe Zaithyel Soekandar a logra un semi-final den e Final A Pro.
A clausura e caredanan riba diadomingo unda cu un prome luga a wordo conkista den 16 experto pa Zyqion Soekandar, un di cinco luga pa Zaithyel Soekandar den e A pro, un di tres luga pa Jaymer Carolina den 17-18 experto y ppor ultimo Shamil Figaroa ta yega e caredanan eliminatorio. Su siguiente siman e atletanan a biaha pa Disney Cup Fall Nationals y aki tambe e resultadonan tabata tremendo. Riba diabierna e hoben Shamil Figaroa a logra un di dos luga dn e 15 experto, mientras Zyqion Soekandar a logra triunfa cu un prome luga, Jaymer Carolina ta keda na di dos luga y por ultimo Zaithyel Soekandar a logra un di cinco luga den e A Pro. Riba diasabra no tabata diferente unda Zyqion Soekandar a logra conkista un di dos luga den 16 experto, Jaymer Carolina a logra un di tres luga den e 17-18 experto, Zaithyel Soekandar un semi-final den e final A Pro y Shamil Figaroa un semi-final den e 15 experto. A clausura e weganan riba diadomingo unda Zyqion Soekandar a logra un di dos luga den e 16 experto, Jaymer Carolina un di tres luga den e 17-18 experto, Zaithyel Soekandar un semi-final den Pro A.
Ya pa varios aña e deporte di BMX ta briya den tur careda internacional, nos atletanan ta hibando un desaroyo riba nivel esaki ta danki tambe na e federacion, clubnan, mayornan y entrenador Pedro Estaba y sin lubida e propio atletanan cu ta dedica varios ora pa dia na e entrenamentonan. E ta exigi un disciplina enorme y tur atleta ta determina pa duna e maximo di nan mes pa logra e miho den cada careda. Lotto, e loteria di Aruba kier a manda un palabra di pabien sigur na henter e delegacion di BMX pa e gran logro aki.
