ORANJESTAD, Aruba - 3 di november, 2015: Dia 7 di november proximo, Aruba Tang Soo Do lo presenta un torneo internacional di deporte riba nos isla cu lo carga e nomber di Aruba Tang Soo Do International Championship 2015. E evento di Tang Soo Do lo bira e prome torneo internacional organisa pa Kyo Sah Nim 2 Dan, Richard Vrolijk, candidato pa 3 Dan di Aruba Tanmagno g Soo Do. E prestigioso Renaissance Convention Center lo host e torneo aki.

For di exterior lo bini un total di 35 atleta esakinan Team Merca procedente di California, lo bin tambe un otro team Merca for di New York, mientras cu lo bini algun atleta individual for di Connecticut, Merca. For di nos region lo bin Team Puerto Rico representa pa Orocovis, lo tey tambe 2 atleta di Guyana, mientras ta wardando confirmacion di Costa Rica. Nos dushi isla di Aruba mes lo participa cu 45 atleta di varios scol di Tang Soo Do, ISA Eagles Martial Arts Club, cu tin varios alumno di USA, Suiza, Hulanda, Venezuela, Inglatera y Francia, sin lubida Aruba Tang Soo Do Shi Sun como tambe Fighting Eagle Academy.

E diasabra mainta pa 8or en punto lo inicia cu e ceremonia di apertura mientras pa 3or y mei di atardi esaki lo termina. Ta bon pa bisa cu na banda di e evento internacional lo bay duna tambe algun clinica riba diabierna 6 november ofreci dor algun “Masters International” di Merca y Puerto Rico. E masternan cu a confirma ta Master Stephanie Argentine (California- Female) - Master Kristie Huethorn (Connecticut-Female), Master Luis Torres Melendez (Puerto Rico - male), Senior Master Robert Leclerc (New York - male), Grandmaster Wesley Jenkins - male Boston).

Den e ultimo añanan hopi federacionnan y asociacionnan mundial a uni y cera cabes caminda tur por encontra nan mes y comparti conocemento y eleva e nivel di Tang Soo Do. Aruba su atletanan sigur no ta keda atras y ta haci bon papel durante campeonatonan di Tang Soo Do rond mundo. E deporte di arte marcial, Tang Soo Do a bira hopi popular na Aruba, e cantidad di scolnan na Aruba a crece unda mas mucha y hoben como tambe hende grandi a cuminsa practica esaki. Un gesto di aplaudi pa mira e cantidad di mayornan cu ta uni hunto cu nan yiunan den e deporte di demostracion aki.

Un danki sigur na Lotto, e Loteria di Aruba pa medio di Comision di Subsidio cu lo subsidia e magno evento internacional di deporte riba nos isla, esta e Aruba Tang Soo Do International Championship 2015.