Oranjestad, 29 di october, 2015: Despues di e tremendo resultado obteni tres siman pasa den e XXX Torneo Criollo Internacional de Levantamiento de Pesas na Puerto Rico, e federacion di hisamento di peso, Aruba Amateur Weightligting Association ta cla pa organisa otro competencia local pa tur su atletanan. Diadomingo 1 di november proximo, AAWA lo organisa Aruba Nationals 2015 esaki den conexion cu e ASU Olimpiade. E competencia lo start pa 11or di mainta esaki den Centro Deportivo Frans Figaroa na Noord. Varios club di pesas a confirma nan participacion mientras cu dos scol di Cross Fit y nan atletanan tambe lo tey presente.
Algun siman atras nos atletanan di pesas a briya den forma unico den un torneo internacional teni na Puerto Rico, nos atletanan a sa na conkista 18 medaya di cual 9 tabata di brons , 6 di plata y 3 di oro. E hobennan prospecto Zymion Loopstok y Gerswin Javois ambos a logra conkista medaya di brons kibrando nan propio record personal, mientras e atletanan Jennifer Piter y Darvin Raphaela a logra conkista medaya di plata y brons durante e competencia aki. E atletanan Joel Kuiperi y Ulrich Hoek tambe a logra medaya den nan respectivo categoria unda ambos a logra medayanan di plata y oro. E atleta Joel Kuiperi a logra gana 3 medaya di Plata, mientras e atleta Ulrich Hoek a sobresali y ta logra triunfa cu e premio maximo ganando 3 medaya di Oro pa Aruba. Tur a atletanan aki riba menciona tambe lo forma parti di e competencia dia 1 di november proximo.
E federacion di hisamento di peso tur aña tin varios competencia local ta organisa riba e dianan tradicional di fiesta manera Dia di Betico, Himno y Bandera 18 di maart como tambe Dia di Rey, sin lubida su campeonato nacional como tambe e participacion na e ASU Olimpiade den luna di november. Den e ultimo tres añanan, e competencianan di pesas a bira mas grandi esaki danki tambe na e deporte revelacion na Aruba cu ta Cross Fit cu ta participa cu un grupo grandi di atleta. Claro cu esaki tin su beneficio mirando cu a crea atletanan nobo pa e deporte di pesas mientras cu algun ya caba a competi pa Aruba den exterior.
Un danki sigur na Lotto, e Loteria di Aruba pa medio di Comision di Subsidio cu a subsidia e federacion di AAWA pa cu e Aruba Nationals 2015
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
