Oranjestad, Aruba: 17 di october, 2015: Recientemente un delegacion di Aruba den e deporte di bodyboard a competi pa dos siman y mei, den e dos diferente competencia organisa pa e asociacion mundial di bodyboard profesional, A.P.B. na e pais di Portugal. Nos e atletanan Jeremy Loefstok, Joshua Kelly, Anthony Wever y Jayfrem Croes a bataya fuerte contra di e top mundial den e deporte acuatico durante di e Sintra Pro 2015 y Nazare Pro 2015 ambos organisa pa e Association of Professional Bodyboarders. E atleta a competi den diferente categoria manera men's open division, dropknee division y junior division. Pa nos atletanan di bodyboard esaki sigur tabata un oportunidad y experiencia unico mirando cu nan a competi contra di e mihonan di mundo den e deporte extremo aki.

Pa loke ta e resultado final mester bisa cu den e competencia di Sinta Pro 2015, e atleta Jeremy Loefstok den rond 2 a keda na di 41 luga den e men’s open division mientras den dropknee e la keda na di 17 luga, e atleta Anthony Wever den rond 1 a keda na di 49 luga den e open men’s division, Joshua Kelly tambe e keda na di 49 luga den e men’s open division mientras cu Jayfrem Croes a keda na di 25 luga den e dropknee division. Den e segundo competencia cual tabata e Nazare Pro 2015, aki e atleta Jeremy Loefstok den rond 2 a keda na di 57 luga den e men’s open division mientras cu Anthony Wever den rond 1 a keda na di 65 luga den e men’s open division.

Den e ultimo añanan, e deporte extremo a bira uno hopi popular na unda particularmente nos hobennan ta practica esaki na nos costanan Norte, esakinan Druif, Wariruri, Dos Playa, Anker y na e Bocanan. Aruba Bodyboard Association ta organisa su competencianan a base regular y ta purba a lo menos di competi un bes pa aña den exterior pa asina nos atletanan gana mas experencia internacional. E dos competencia di taya mundial na Portugal sigur ta uno cu nos atletanan a siña hopi di dje.

Lotto, e Loteria di Aruba pa medio di Comision di Subsidio ta contribui cu e parti financiero. Mas cu claro e federacion deportivo mester cumpli cu algun di e exigencianan stipula pa por yega na remarca pa esaki.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.