ORANJSTAD, Aruba - 16 di october, 2015: Recientemente Aruba Basketball Bond a ricibi un invitacion pa atende un FIBA Zone Assembly 2015. E FIBA Zone Assembly 2015 lo tuma luga e dianan 16 y 17 di October na e ciudad di San Juan, Puerto Rico unda e Headquarters di FIBA Americas ta situa. Aruba tambe lo ta presente na e congreso aki den persona di e presidente di Aruba Basketball Bond, Sr. Geraldo Milton.

Durante di e asamblea diferente puntonan di agenda importante lo ser trata, tur esaki na beneficio di e deporte di basketball den henter e continente America. Lo presenta varios relato con a ser traha den e zona nan di America Central y Caribe, Sur America y Noord America, tambe lo presenta su relato e Presidente di FIBA Americas, Sr. Usie Richards. Mas cu claro lo discuti riba otro puntonan manera e posibel cambionan den e statuto di FIBA tur esaki con pa engrandece mas ainda e deporte di basketball den e continente America y tur bienestar di esnan cu ta practica e deporte.

Lotto, e loteria di Aruba no solamente ta aporta na e desaroyo di nos atleta y entrenadonan pero tambe na e participacion di nos dirigentenan na congresonan importante organisa pa e federacion regional di e deporte. Pa nos dirigentenan deportivo e ta di suma importancia pa keda na altura di e ultimo desaroyo y posibel cambionan rond di e maneho di e deporte door di e federacion regional en cuestion.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e presidente di ABB pa e FIBA Zone Assembly 2015 na San Juan, Puerto Rico.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.