ORANJESTAD, Aruba - 16 di october, 2015: Caredanan di triatlon por varia den distancia, for di caredanan riba distancia cortico pa distancianan super largo. Actualmente un di e formato mas popular ta e asina yama Sprint Triathlon. E careda di Sprint Triatlon ta consisti di 750 meter landa, 20km core bicicleta y finalisa e competencia cu un 5 km careda na pia. E ta wordo yama un sprint triathlon mirando e distancianan cortico cu un atleta mester core durante di e competencia. Esaki ta pone cu e atleta por landa, core bicicleta y core na pia den un ritmo basta lihe compara cu riba distancianan largo caminda e atleta mester bay mucho mas relaha y cu hopi mas resistencia pa e por finalisa su evento.

Na Aruba e evento di Sprint Traithlon ta masha popular y gusta bou di e participantenan. Atletanan den tur edad ta participa y tambe lo tin un mita distancia pa e hobennan den e edad mas abou. Pa e Kids esaki ta 375 meter landa, 10 kilometer core bicicleta y finalisa cu 2.5 kilometer core na pia. Mas cu claro por competi den relay team tambe. Dia 18 di october proximo, Aruba Triathlon Association lo organisa su competencia di Sprint Triathlon cuminsando na e luga di semper esta Boca Catalina na Arashi.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e evento di Sprint Triathlon organisa pa ATA.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.