ORANJESTAD, Aruba – 15 di october, 2015: Durante di e dianan di vakantie grandi, e hoben tri-atleta Giannon Eights tabata tin dos compromiso den exterior. Ta asina cu e hoben Eights a competi den dos evento di Kids Triathlon International na Gainesville como tambe North Miami ambos den e estado di Florida. Mester bisa cu ambos competencia a bay na satisfaccion pa e atleta Giannon Eights mirando cu den tur dos evento, e la logra subi riba podium.

E prome competencia cu tabata e Youth Combine Fall Triathlon na Gainesville, e triatleta Arubano a logra un di dos luga overall unda e ta finalisa e evento den un tempo di 19 minuut y 48 seconde. Notabel ta cu Giannon a finalisa e evento 17 seconde tras di e atleta cu a yega na di prome luga. Su siguiente e hoben Giannon Eights a competi den e North Miami Kids Triathlon, esaki den categoria 13-15 aña. Den e evento aki tambe Giannon a logra sobresali unda e ta finalisa na un di prome luga den su categoria Male 13 marcando un tempo final di 25:27.7. E hoben ta satisfecho cu e resultado final, e tabata un experencia unico pa competi den dos evento grandi na Florida unda e participacion tabata masal y di nivel halto. Ta bon pa bisa acerca cu for di awor caba Giannon tin bista riba e Youth Olympic Games cu na 2018 lo wordo teni na e ciudad di Buenos Aires, Argentina.

Lotto, e Loteria di Aruba cu pa medio di Comision di Subsidio a yuda subsidia e biahe di e atleta Giannon Eights ta contento di por aporta na e exito di tur nos hoben atletanan cu ta competi den exterior.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.