ORANJESTAD, Aruba – 13 di october, 2015: Despues di un exitoso evento na maart ultimo unda un gran cantidad di atletanan di judo a participa na e prome Subway Challenge, recientemente a ripiti e grandioso evento cu a haya e nomber di Subway Challenge number dos esaki na Eagle Sport Club. Un bon publico a asisti na e evento di judo cu a conta cu un participacion di alrededor di 80 judoka. Esunnan presente por a disfruta den e diferente combatenan den e categorianan 1 – 2 – 3, cadet, junior y senior.

Mester bisa cu tur e atletanan a haci nan maximo esfuerso pa brinda e publico presente un tremendo espectaculo cu e tecnica y tacticanan cu cada uno a siña na nan scol. Ta bon pa menciona cu Aruba tin algun hoben prometedor den e deporte di combate aki y recientemente algun di nos judokanan a logra bon papel den diferente competencia teni na entre otro na Merca. No mester lubida cu e deporte di judo a representa Aruba den competencianan grandi manera Weganan Suramericano, Panamericano y Olympico.

E interes bou di e deporte di judo ta creciendo mas y mas bou di nos hobennan mientras e federacion ta trahando duro pa acopla mas mucha cu ta posibel den e diferente scolnan rond Aruba. Di parti Lotto, e loteria di Aruba nos kier a manda un palabra di felicitacion na e federacion di judo, e atletanan y tur e boluntarionan cu e contribui na e exitoso competencia Subway Challenge dos.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e evento di judo Subway Challenge number dos.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.