ORANJESTAD, Aruba – 13 di october, 2015: Tur aña Aruba ta sede di diferente torneonan deportivo internacional unda paisnan den nos region ta bin y competi hunto cu esunnan di Aruba mes. Den e vakantie di luna di october cu a caba di pasa, mayoria di nos atletanan tawata mas activo cu nunca cla pa atende compromisonan na Aruba of den exterior. Riba dianan 1 y 2 di october, e federacion di ciclismo, seccion BMX tawatin un careda internacional grandi riba e Pista di Bike Cross na Jaburibari.

E evento a haya e nomber di BMX Challenge y a conta cu un participacion masal di coredonan procedente di e paisnan bisiña Corsou y Venezuela sin lubida nos propio coredonan di Aruba mes. Despues di basta tempo a organisa atrobe un careda riba e pista di bike cross na Jaburibari. Durante añanan nos atletanan di BMX a competi den varios eventonan grandi den exterior logrando resultadonan positivo pa e deporte y pa Aruba. E biaha aki nos tawatin e oportunidad di mira cada uno den accion e dos dianan cu a pasa contra top coredonan di tanto Venezuela como Corsou. Lotto, e loteria di Aruba hunto cu Comision di Subsidio semper ta aporta na nos federacionnan cu ta trahando duro na progreso di nos atletanan local. Ta importante pa duna e contribucion y sosten necesario na eventonan deportivo local y internacional teni na Aruba mes.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e evento internacional di bike cross BMX Challenge na Jaburibari.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.