ORANJESTAD, Aruba – 13 di october, 2015: Dia 25 di september a tuma luga na Richmond, Virginia e campeonato mundial di ciclismo organisa door di e federacion mundial di ciclismo, UCI. Durante di e campeonato mundial, e federacion a probecha di e oportunidad di organisa e congreso anual pa tur su miembronan rond mundo. Contrario na e añanan anterior, e aña aki si Aruba Wielerbond tawata presente na e asamblea y representa pa su presidente, Juelle Thode.
Un asamblea anual di un federacion mundial di deporte ta hopi importante y mester ser atendi pa nos representantenan maximo di cada federacion deportivo, esaki pa un tin continuacion positivo cu lo yuda na engrandece e desaroyo di e deporte den su totalidad. Durante e asamblea di UCI a presenta e relatonan anual, a eligi un directiva nobo, a duna meritonan, mientras a papia y discuti riba diferente topiconan cu tin di haber cu e deportenan cu ta cay bou di UCI cu ta ciclismo di ruta, mountain bike y BMX. Asina tin mucho mas informacion cu lo wordo duna rond di e desaroyo di e tres deportenan aki. E federacion di AWB mes lo purba establece contact mas estrecho cu e federacion Mericano di ciclismo pa mira si por tin un posibel trahamento hunto entre ambos pais.
Lotto, e loteria di Aruba no solamente ta aporta na e desaroyo di nos atleta y entrenadonan pero tambe na e participacion di nos dirigentenan na congresonan importante organisa pa e federacion mundial di nan deporte. Pa nos dirigentenan deportivo e ta di suma importancia pa keda na altura di e ultimo desaroyo y posibel cambionan rond di e maneho di e deporte door di e federacion mundial en cuestion.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e presidente di AWB pa e Congreso organisa pa e federacion mundial di ciclismo, UCI na Richmond, Merca.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
