ORANJESTAD, Aruba – 13 di october, 2015: Despues di a pasa un temporada di vakantie grandi, e atletanan di landamento sincronisa a reanuda entrenamento den luna di augustus y diasabra 26 di september, e federacion di landamento, A.Z.B a organisa e prome competencia oficial pa e atletanan di landamento sincronisa.
Na augustus e entrenamentonan a inicia cu e parti basico unda e focus mas bien tabata riba e parti tecnico di landamento sincronisa. Awo cu e atletanan a cambia di categoria di edad, esaki lo nifica figuranan nobo y mas dificil pa ehecuta. Pues segun edad ta avansa mas dificil e parti tecnico y di landamento sincronisa lo bira y mas cu claro e lo exigi mucho mas sacrificio di cada atleta. E grupo di nobato di aña pasa awor tambe lo uni cu e ekipo di 12 & Under.
Den e siguiente tres lunanan e atletanan ta pasa cada luna un tesis riba e parti tecnico locual ta e figuranan pa asina fin di e luna di december, e pre - seleccion por wordo scogi y forma pa aña 2016. E competencia di figuranan lo ta tuma luga na Piscina Olimpico Roly Bisslik na Savaneta pa 9or di mainta. Mester bisa cu Aruba ta entre e miho paisnan den Caribe den e deporte acuatico aki. Den mayoria competencia grandi den nos region, nos seleccion di landamento sincronisa a briya den nan presentacion y a sa na gana respet di tur nos rivalnan mas cercano. E participacion den e Weganan CAC di Veracruz, Mexico unda a logra un medaya di brons den duet y un di cuater luga den ekipo como tambe mas recien, e tremendo presentacion durante di e Weganan Panamericano na Toronto, Canada ta pone e deporte di landamento sincronisa den un mira positivo mundialmente.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di landamento sincronisa organisa pa AZB.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
