ORANJESTAD, Aruba - 18 di september, 2015: Diasabra awo 19 di september, e federacion di landamento, AZB lo organisa su prome competencia di e temporada 2015 – 2016 na Piscina Olimpico Roly Bisslik na Savaneta. E competencia ta carga e nomber di Sprint Night unda lo wordo landa riba distancia cortico(“short course”), esta 25meter. Tur atleta participante lo tin e oportunidad di landa y bataya riba distancia cortico di 25 y 50 meter. E miho atletanan di landamento di e miho tres clubnan na Aruba, Stingray Swimming, Aruba Dolphins y The Orca’s sigur lo bay tey. E competencia ta programa pa cuminsa 7or.
E deporte di landamento no mester mucho introduccion na Aruba. Cada prestacion ta papia pa su mes. Considera como un di e mihonan di Caribe nos atletanan di landamento ya a traha un nomber den exterior. Exitonan di e ultimo añanan den e diferente competencianan internacional manera CARIFTA, CONSENAT, CISC, CCCAN y otronan a pone varios di nos landadonan scoge pa un rumbo mas profundo den e deporte acuatico unda e mayoria ta combina nan studia cu nan deporte preferi den exterior, principalmente den e area di Florida, Merca. Tur e atletanan aki lo kier representa Aruba lo mas miho cu ta posibel den e maximo competencianan mundial di landamento.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di Sprint Night organisa pa AZB.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
