ORANJESTAD, Aruba - 16 di september, 2015: Diadomingo 13 di september proximo, Aruba Triathlon Association a organisa su Guardian Group Duathlon Nacional pa mucha, junior y adulto. Na e mainta aki por a competi den e categorianan individual of den ekipo di relevo. E evento a cuminsa na Boca Catalina pa 7:00 di mainta.

Lo recori diferente distancia esakinan pa mucha te cu 14 aña cu mester a core un total di 2.5 km, despues core bicicleta 10 km y finalisa e competencia cu coremento na pia riba un distancia di 1.5 km. Pa loke ta e categoria di Junior y Adulto, esakinan a recori un distancia mas largo. Prome mester a core na pia un distancia di 5km, despues subi bicicleta y recori un total di 20 km pa despues finalisa e evento cu un coremento na pia riba un distancia di 3km. Tambe tin e evento pa nos atletanan femenino, unda cu den Female Open 15+ nos damanan mester a core na pia 5km mientras cu riba bicicleta lo mester haci un recorido di 20km y por ultimo bolbe core na pia un trayectorio di 3km. Lo reparti medaya pa e categoria.

Un danki sigur na Lotto, e Loteria di Aruba pa medio di Comision di Subsidio cu a subsidia e evento di Duathlon organisa pa e federacion di triatlon.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.