ORANJESTAD, Aruba - 16 di september, 2015: Pa casi un siman largo, nos atletanan elite den e deporte di BMX, esta Zaythiel Soekandar y Feddison Flanders hunto cu coach Pedro Estabalo a permanece na Rock Hill, South Carolina na Merca, unda e atletanan Soekandar y Flanders lo atende un campo di entrenamento como tambe competi den e 2015 UCI BMX Supercross World Cup Finals. Durante dos dia largo, mas cu 200 coredo profesional di bike cross procedente di 25 pais lo bataya pa e tres miho puestonan disponibel. Na e careda aki e atletanan por acumula pa yega na e clasificacion Olimpico di otro aña na Rio de Janeiro, Brasil.

Ya pa varios aña nos atletanan di BMX a representa Aruba den e diferente campeonatonan grandi rond mundo. E atletanan Soekandar y Flanders a competi den e Weganan Sur Americano pa Aruba na Santiago de Chile unda ambos a yega e gran final. Recientemente e coredo Soekandar a competi den e Weganan Panamericano 2015 na Toronto, Canada. E federacion di ciclismo, seccion BMX hunto cu coach Pedro Estaba ta trahando duro cu nos atletanan hoben unda ta biaha cu nan pa asina nan atende camponan di entrenamento y tambe competi lo mas hopi cu ta posibel den exterior, esaki pa gana mas experencia. Esaki sigur ta un sacrificio, pero tambe un muestra di disciplina y dedicacion pa asina logra realisa e metanan poni.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e atletanan cu lo atende e entrenamento di BMX na South Carolina, Merca.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.