ORANJESTAD, Aruba - 28 di augustus 2015: E dianan 8 y 9 di augustus un delegacion den e deporte di ciclismo di ruta a competi den e Junior Caribbean Cycling Championship na Republica Dominicana. E aña aki e competencia a wordo organisa pa e federacion dominicano di ciclismo.
Mester bisa cu Aruba a sali cu un delegacion di 6 ciclista kendenan lo midi forsa contra e otro coredonan junior di Caribe. E atletanan cu a haya e oportunidad pa representa Aruba ta den e categoria junior Gabriel Thielman, Jair de Santiago y Jonathan Croes, tambe nos tin e coredo femenino Oriana Thielman mientras den e categoria di Pre-junior lo competi e coredonan Kylian Balkenstein y Ruson Gonzales. Como coach a biaha Alfredo Palavecino.
E competencia na Republica Dominicana tin un duracion di dos dia unda riba e prome dia lo core e famoso careda contra holoshi, mientras pa su mañan e careda di ruta. Nos atletanan junior a hiba un preparacion debido di varios luna pa e Junior Caribbean Cycling Championship.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di nos delegacion di ciclismo di ruta pa e campeonato Junior Caribbean Cycling Championship na Republica Dominicana.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
