Oranjestad, Aruba - 16 di juli, 2015: Recientemente un delegacion den e deporte di ciclismo a biaha pa e isla di Anguila unda e di 16 edicion di e famoso careda di bicicleta John T Memorial Cycling Race a tuma luga. E atletanan cu a representa Aruba tabata Gabriel Thielman, Gino Hodge, Jair de Santiago y Jonathan Croes. Como miembro di e delegacion a biaha Monique Leerdam.

Mester bisa cu varios pais den e region di Caribe tur aña ta participa na e John T Memorial Cycling Race cu a bira hopi popular unda mas y mas competido ta bin participa. E evento cu a tuma luga diadomingo 5 di juli tabata tin un trayectorio largo, unda mester e recori alrededor di 130km pa e ciclistanan elite, mientras den junior y masters esaki tabata 84km. E careda a wordo organisa pa e federacion di ciclismo di Anguila esta ACA.

Un danki sigur na Lotto, e Loteria di Aruba pa medio di Comision di Subsidio cu a subsidia e delegacion di ciclismo di Aruba pa cu e 16th John T Memorial Cycling Race.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.