Oranjestad, Aruba – 6 di juli, 2015: Recientemente un seleccion hubenil di landamento di Aruba tabata presente na e isla di Barbados unda nan a competi den e Central American and Caribbean Amateur Swimming Confederation, CCCAN. Mester bisa cu un bes mas e seleccion di Aruba a haci un tremendo papel unda nan a logra conkista un total di 22 medaya di cual 6 di Oro, 13 di Plata y 3 di Brons.
E aña aki e seleccion di Aruba tabata simplemente consistente y dominante den e competencianan di landamento den nos region. Tanto den e competencianan di Carifta, CISC y Consanat, numeroso cantidad di medaya a wordo gana, sin lubida e recordnan nobo cu a keda marca pa nos atletanan, esaki di e competencianan mes y tambe personal.
Notabel ta cu den e campeonato di CCCAN, e ekipo di femenino relay consisti Keeley Maduro, Anahi Schreuders, Flory Kock y Elisabeth Timmer a bolbe pone otro stempel den un campeonato di landamento den nos region ora cu nan ta logra supera un record cu tabata tin mas cu 35 aña riba nomber di Mexico. Despues di a causa furor den e campeonato di Carifta y CISC, e damitanan di Aruba a logra gana otro medaya di oro den e 4x100m estilo liber na Barbados y den un tempo record di 4.01.18. Esaki sigur ta un muestra cu e cuarteto Arubano tabata esunnan miho e temporada aki den e competencia di landamento den nos region.
Mas cu claro tabata tin otro landadonan kendenan tambe a causa furor y gana medaya di Oro. Esnan cu tambe a triunfa riba e podium halto tabata Jemal Le Grand den 200 estilo liber, Patrick Groters den 50m lomba, Daniel Jacobs den 400m estilo liber, Keeley Maduro den 50m mariposa y e mix relay consisti di Andrea van den Berg, Joseph Winterdal, Rebecca Maduro y Mikel Schreuders.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e seleccion di landamento pa e competencia di CCCAN 2015.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
