Oranjestad, Aruba – 12 juni, 2015: Tur cos ta cla pa e campeonato nacional di atletismo organisa pa e federacion di atletismo, A.A.B.. E aña aki e comision organisado lo premira cu e campeonato nacional lo bay ta uno grandisimo cu un cantidad record di atleta kendenan lo competi den e diferente disciplina nan.
Aña pasa un total di 13 club miembro a participa na e campeonato nacional. E competencia nacional mas cu claro lo tuma luga den e cas di atletismo na Aruba cu ta stadion Guillermo Prospero Trinidad na Dakota, pero tambe riba tereno di Mercurius unda lo tin algun disciplina manera “discus y speerwerpen”. E clubnan participante e aña ki lo ta AAC, ADRA, Arruwac, Athletic &-21, CAMO, Malmok Runners, Olympia Track & Field, Stars, Sunrise, Thrilwalkers y Y Track.
Alrededor di 250 atleta den tur edad y disciplina a inscribi caba pa e competencianan di, entre otro, horden, sprint 60m, 100m y 200m, pusha bala, bula leu, estafette, speerwerpen, cana lihe, tira discus, bula halto, tira bala y core distancianan largo manera e 400m, 800m, 1500, 3000m y 5000m. Mester bisa cu e disciplinanan di coremento y canamento lihe a bira super popular cerca esunnan cu ta practica esaki, e participacion lo bay bira uno masal den e tres dianan di competencia.
Un danki sigur na Lotto, e Loteria di Aruba pa medio di Comision di Subsidio cu a subsidia e campeonato nacional di atletismo.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
