Oranjestad, Aruba - 11 di juni, 2015: Pa tres dia largo piscina Olimpico Roly Bisslik na Savaneta tabata testigo cu Aruba su miho clubnan di landamento a hiba un bataya fuerte contra di otro pa mira ken por yama su mes e miho di aña 2015. Dilanti di un publico grandisimo kendenan a baha masal pa apoya e nan clubnan di landamento, e atletanan tur a haci nan maximo esfuerso pa brinda tur presente un espectaculo di kita sombre.
Den tur edad e competencia, entre e clubnan di Aruba Dolphins, Stingray Swimming y The Orcas, tabata fuerte y cera. Na final di dia, e organisacion di Aruba Dolphins Swimming a resulta den e ganadonan absoluto di e Arubaanse Kampioenschappen 2015 ora nan ta logra triunfa cu un total di 293 medaya di cual 99 di oro.
Mester bisa acerca cu den e categoria femenino, e landadonan Elisabeth Timmer y Daniella van den Berg ta logra supera record den e Campeonato Arubano 2015, unda Daniella ta haci esaki den cuater diferente disciplina esaki 800 Free, 100 Fly, 200 Fly y 200 IM. Pa loke ta e recordnan den e categoria masculino nos tin e hobencito Jaydon Croes den e 50m free, Renze POSTMA den e 200m Lomba y Jordy Groters den e 200m IM.
Pa loke ta e resultado final nos mester bisa cu Aruba Dolphins Swimming a gana un total di 293 medaya di cual 99 di oro, 105 di plata y 89 di brons Stingray Swimming a gana un total di 189 medaya di cual 85 di oro, 60 di plata y 44 di brons, The Orcas a logra un total di 27 medaya, di cual 6 di oro, 8 di plata y 13 di brons.
Un danki sigur na Lotto, e Loteria di Aruba pa medio di Comision di Subsidio cu a subsidia e Arubaanse Kampioenschappen den landamento.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
