Oranjestad, Aruba - 10 di juni, 2015: Den e fin di siman tras di lomba, Aruba Bodyboarding Association a tene su competencia cu a carga e nomber Copa Anker 2015. Durante dos dia largo un grupo grandi cu ta practica e deporte extremo a bini hunto y bataya den e di tres evento pa loke ta trata ranking Nacional 2015 . Mester bisa cu e condicion di lama tabata entre 2 - 5 pia cu olanan grandi di robes pa drechi y viceversa.

Pa loke ta resultadonan final nos tin cu bisa cu den e Open Division Bodyboard e atleta Jeremy Loefstok a keda na di prome luga mientras Joshua Kelly a sali na di dos luga sigui pa Jayfrem Croes cu a keda na di tres luga y Anthony Wever na di cuater luga. Den e Division Open Surf, e prome luga a bay pa Xenon Laclé, e atleta Etienne Rudel a keda na di dos luga y Wesley Martinez a keda na di tres luga cu Danny Yarzagaray na posicion number cuater.

Den e Division di Dropknee Bodyboard, e prome luga a bay pa Kenny Kock, sigui pa Jeremy Loefstok cu a keda na di dos luga y Jerred Stede kende a termina na di tres luga y ppor ultimo Roduard Ferrier na di cuater luga. Den e Division di Junior Bodyboard, e prome luga a bay pa Jayfrem Croes, sigui na di dos luga pa Rick Werleman, mientras na di tres y di cuater luga a keda Jared de Vries y Aaron Angela. Pa loke ta e Division femenino, nos tin den Women Surf, Tatja Becker cu a keda na di prome luga, sigui pa Lea Mesker cu a termina na di dos luga. Den e Division di Women Bodyboard, Ebrina Curet a bira triunfador logrando e prome luga, sigui pa lienne Lopez cu a termina na di dos luga y Xianthe Jansen kende a termina na di tres luga.

Un danki sigur na Lotto, e Loteria di Aruba pa medio di Comision di Subsidio cu a subsidia e competencia na Anker 2015.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.