Oranjestad, Aruba - 5 di juni, 2015: Den e cuadro pa haya mas hende capacita riba e tereno di prome auxilio den deporte y un comunicacion mas eficiente entre e directiva y su miembronan como tambe cu prensa en general, Aruba Sport Unie a organisa dos curso pa e representantenan di federacionnan deportivo na Aruba.

Pa varios aña, ASU a mira cu ta existi e necesidad pa tin mas hende capacita riba e tereno di Prome Auxilio na e diferente actividadnan deportivo tur fin di siman rond di nos isla, esaki ta conta tambe pa e diferente entrenamentonan cu ta tuma luga tur dia.

Un otro aspecto cu ASU a haya cu mester a traha riba dje ta e bon comunicacion cu mester existi entre un directiva y su demas miembro of organisacionnan deportivo, pero tambe cu medionan di comunicacion masivo. Den e cuadro aki a ofrece dos workshop, un di CPR y un di Marketing/PR pa e representantenan di e federacionnan deportivo. E cursonan a wordo duna dor di Sr. Gerald Franca y Sr. Erik Gomez.

Un danki sigur na Lotto, e Loteria di Aruba pa medio di Comision di Subsidio cu a subsidia e curso di Marketing/PR y CPR di Aruba Sport Unie.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.