Oranjestad, Aruba - 2 di juni, 2015: E dianan 6 y 7 di juni proximo, Aruba Bodyboard Association lo organisa un un tremendo competencia di bodyboard na Anker/Grapefield na San Nicolas. E competencia ta priminti di bira unico den e categorianan di Open, Women, Dropknee y Junior. Den e division di Surf nos ta haya e categorianan di: Open y Woman.
Durante e ultimo aña nan mas hopi atleta a afilia nan mes na e deporte extremo aki y casi tur siman e costa pa noord di Aruba ta yen di hende cu ta practica bodyboard, dropknee y surf. Aruba Bodyboard Association sigur ta trahando duro pa engrandece e deporte di bodyboard y surf bou di nos hobennan y mas cu claro Lotto ta yuda contribui pa haci e deporte extremo aki mas grandi ainda.
Un danki sigur na Lotto, e Loteria di Aruba pa medio di Comision di Subsidio cu lo subsidia un parti di e competencia di Aruba Bodyboard na Anker/Grapefield.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
