Oranjestad, Aruba – 2 di juni, 2015: Diasabra ultimo Arubox a tene henter un dia di seminario cu e experto internacional den boxeo, Ray Silvas, den e edificio di ATIA na Dakota. E seminario tabata specialmente destina pa e referee y huesnan di e boxeo amateur.

E experto Sr. Silvas tin un conocemento amplio den e deporte di boxeo mirando cu e ta miembro di USA Boxing Board, vice-presidente di AMBC como tambe miembro ehecutivo di AIBA. Mester bisa cu interes pa e seminario tabata grandi unda varios persona den e mundo di boxeo Arubano a aplica pa sigui e seminario.

Pa mas di seis ora largo Sr. Silvas a trata diferente topiconan interesante riba e tema: arbitra un pelea di boxeo. Temanan cu a bini padilanti tabata “ken y kiko ta un bon referee”, “interpretacion di regla bieu cu e reglanan nobo”, “con pa husga un pelea di boxeo” y e “importancia pa conoce y aplica reglanan na un nivel halto”. Na final varios cursista a keda hopi satisfecho cu e desaroyo di e seminario unda a amplia un poco mas e conocemento propio. Por ultimo cada cursista a haya un certificado di participacion for di man di Sr. Ray Silvas.

Un danki sigur na Lotto, e Loteria di Aruba pa medio di Comision di Subsidio cu a subsidia e seminario pa nos referee y huesnan di boxeo.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.