Oranjestad, Aruba - 1 di juni, 2015: Den deporte ta importante pa cada bes bo tin refereenan nobo y, mas cu tur cos, certifica cu ta yuda engrandece e nivel di e deporte. Paso con cu bay bini sin un referee ta dificil pa un deporte bay na un manera ordena sin aplica regla, esaki specificamente ta e trabou di un referee. Recientemente Aruba Amateur Weightlifting Association a organisa un curso di referee monitor level 1 pa tur interesado den e deporte di hisamento di peso.
E curso den su totalidad tabata tin un duracion di dos dia, caminda a parti esaki den un dia e parti teoretico y e otro dia e parti practico. Mester bisa cu e interes tabata grandi sigur bou di esunnan cu a caba di cera conoci cu e deporte di hisamento di peso. E curso a wordo duna door di Patrick Vrolijk asisti pa Hugo Themen kende ta un referee internacional certifica nivel 1. Na final e cursista a haya nan certificado di participacion.
E federacion di hisamento di peso AAWA ta masha satisfecho cu awor nan ta conta cu varios referee nobo y cu por wordo uza den nan futuro competencianan. Esunnan cu e ricibi nan certificado a bini di diferente gym na Aruba cu ta practica Cross Fit pero tambe e deporte di hisamento di peso, nan ta Barbell in Paradise Crossfit, Buchi Athletic Gym, Muscles & Lungs Crossfit, TNT Gym y Sanicolas Sport Center. Mirando e interesa grandi di participacion, e federacion di pesas, AAWA lo bini cu un di dos curso monitor level 2. Un palabra di pabien sigur na tur e cursistanan cu e logra e curso monitor level 1 cu exito.
Un danki sigur na Lotto, e Loteria di Aruba pa medio di Comision di Subsidio cu a subsidia e curso di monitor nivel 1 organisa pa e federacion di hisamento di peso AAWA.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
