Oranjestad, Aruba - 20 di mei, 2015: Un di e deportenan cu mas a cosecha exito internacionalmente pa Aruba esaki den e ultimo 10 añanan ta esun di landamento sincronisa. Ya pa varios aña e seleccion nacional di landamento sincronisa ta ser considera un di e miho nan den nos region, unda cu Aruba den mayoria competencia ta logra conkista e premio maximo den diferente competencianan grandi cu nan ta participa na dje. E popularidad di e dos atletanan a haci cu mas y mas mucha muhe a cuminsa na practica e deporte di landamento sincronisa.
E dianan 23 y 24 di mei, Arubaanse Zwembond lo organisa su campeonato nacional di Landamento Sincronisa, esaki den Pool Olimpico Roly Bisslik na Savaneta. E lo bira un campeonato na cual tur club miembro lo participa, mientras cu lo bini tambe un club di nos hermana isla Corsou.
Mester bisa cu e landadonan nobato lo estrena pa prome biaha cu un demostracion di tur loke nan a siña, mientras despues lo tin e competencia di rutina "Solo" den e categoria nobato, 12 aña y menos, y 13-15 aña. Pa su mañan diadomingo lo cuminsa cu e rutina di “duet”, sigui pa e competencia di team.
Un danki sigur na Lotto, e Loteria di Aruba pa medio di Comision di Subsidio cu a subsidia e campeonato nacional di landamento sincronisa.
