Oranjestad, Aruba - 12 di mei, 2015: Riba invitacion di e Federación de Levantamiento de Pesas Panamericano, FPLP, e conocido ex-atleta, dirigente y hues di hisamento di peso, Sr. Hugo Themen a biaha pa e ciudad di Cartagena, Colombia unda e la fungi como hues durante di e Campeonato Panamericanos Juveniles de Levantamiento de Pesas cu a tuma luga e dianan 2 pa 10 di mei.

Pa hopi aña, Sr. Hugo Themen ta un di e pilarnan den e deporte di hisamento di peso na Aruba. Na banda cu su persona tabata un tremendo atleta cu a cosecha hopi exito internacionalmente, e la converti su mes den un hues renombra. Den numeroso ocasion su persona a wordo invita pa para hues den e diferente competencianan den nos continente pero tambe na nivel mundial. Su dedicacion na e deporte ta uno grandi y pa e motibo aki tambe Sr. Themen ta gana e confiansa tur caminda cu e bay.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e hues Hugo Themen pa e Campeonato Panamericano di Pesas na Cartagena, Colombia.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.