Oranjestad, Aruba - 12 di mei, 2015: E atleta di hisamento di peso, Joel Kuiperi apenas tin un aña y mei ta practica e deporte di hisa peso, pero desde e la cuminsa a wak un talento enorme den e hoben atleta Arubano. Siman pasa, e atleta Kuiperi a haya e oportunidad pa prome biaha representa Aruba den un campeonato den exterior.

Mester bisa cu e hoben atleta di 19 aña di edad a logra un tremendo resultado den e Campeonato Panamericano Juvenil di hisamento di peso cu a tuma luga na Cartagena di Indias-Colombia. Joel Kuiperi a competi den categoria di 105kg unda tabata tin un elenco di shete atleta di e continente America.

Pa loke ta e resultado final mester bisa cu Joel a logra hisa 117 kg den snatch y 145kg den clean & jerk pa un total di 262 Kg. Esaki a haci cu Joel a termina na di cinco luga den e competencia mientras e ta logra kibra e record hubenil di Aruba cu dos kilogram. E federacion di AAWA por ta orguyoso di e prestacion di su atleta kende a wordo guia pa e entrenador nacional di hisamento di peso, Adolfo Gallego Salas.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atleta Joel Kuiperi y su coach Adolfo Gallego pa e Campeonato Panamericano Hubenil di hisamento di peso.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.