Oranjestad, Aruba - 8 di mei, 2015: E dianan 15 pa 24 di mei proximo, un delegacion den e deporte di ahedrez lo biaha pa Montivideo, Uruguay unda nan lo participa na e Campeonato Continental Absoluto de las Americas 2015. Aruba lo participa cu dos hungado kendenan ta “Woman Fide Master” Maria Diaz y “Candidate Master” Octavio Croes. Mester bisa cu e torneo ta sirbi como un clasificacion pa e Mundial di Ahedrez cu lo tuma luga den e luna di september na Baku, Azerbayan.

Aunke e deporte di ahedrez ta uno cu tiki actividad di movecion, asina mes mentalmente uno mester ta fuerte mirando cu e wega por dura oranan largo debi na e maximo concentracion di cada hungado. Un eror chikito den un hugada por costa bo henter e wega. Na Aruba, e deporte a bira uno masha popular, specialmente bou di nos hobennan y tambe grandinan. E deporte di ahedrez ta representa Aruba dignamente den torneonan internacional y ta logra resultadonan impresionante.

Un danki sigur na Lotto, e Loteria di Aruba pa medio di Comision di Subsidio cu a subsidia e delegacion di Aruba pa e dos hungadonan por representa Aruba den e evento internacional di ahedrez na Montivideo, Uruguay.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.