Oranjestad, Aruba - 8 di mei, 2015: E dianan 8 pa 10 di mei binidero lo tuma na nos hermana isla di Corsou, e torneo ABC Tournament 2015 den e deporte di dammen. E delegacion di Aruba lo wordo representa pa e atletanan Henri Knepa, Rolin Croes, Octavio Croes y Juan Nisbet.

Mester bisa cu Aruba 1 ta consisti di e hungadonan Henry Knepa y Rolin Croes, mientras Aruba 2 lo consisti di e hungadonan Octavio Croes y Juan Nisbet. Como coach lo biaha Delbert Alexander. E weganan lo tuma luga den e Hotel San Marco y Rust & Burg. For di diabierna caba lo inicia cu e prome ronda mientras cu diadomingo e ronda final lo tuma luga y lo clausura e torneo cu e entrega di premio.

Den e torneo aki Aruba lo tin 2 ekipo, mientras cu Corsou y Boneiro tambe lo wordo representa pa dos ekipo. Den total Aruba lo hunga 4 wega tanto contra Corsou y Boneiro. Ta bon pa menciona cu desde aña 2005 e tres islanan ta organisando e ABC Tournament den dammen, mientras e edicion di ABC Tournament 2016 lo tuma luga na Aruba.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di dammen pa e ABC Tournament na Corsou.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio