Oranjestad, Aruba - 7 di mei, 2015: Fin di april proximo lo tuma luga e Open di Canada den landamento sincronisa. E dos atletanan elite di Aruba den e deporte aki, esta Anouk Eman y Kyra Hoevertsz tambe lo forma parti di e competencia aki. Despues cu aña pasa na november e duo di Aruba a logra gana e medaya di brons durante e Weganan Centro Americano y del Caribe na Veracruz, Mexico, ambos atleta a cuminsa prepara pa e Weganan Panamericano di Toronto, Canada cu lo tuma luga den e luna di juli proximo.

E hecho cu nan a clasifica pa e Weganan Panamericano 2015, e duo Eman y Hoevertsz lo competi den algun competencia di fogeo unda e mihornan di mundo den landamento sincronisa ta participa. Tanto Anouk como Kyra ta residencia na Merca unda nan ta combina e deporte di landamento sincronisa cu nan estudio. Cu nan scol na Merca y cu e seleccion di landamento sincronisa di Aruba, ambos atleta ta masha exitoso den e deporte acuatico unda varios triunfonan grandi a ser logra den e ultimo dos añanan.

Un danki sigur na Lotto, e Loteria di Aruba pa medio di Comision di Subsidio cu a subsidia e participacion di e atletanan di landamento sincronisa na e Open di Canada.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.