Oranjestad, Aruba - 23 di April, 2015: Siman pasa un seleccion hubenil den e deporte di taekwondo a biaha pa e ciudad di Guayama, Puerto Rico, unda nan a competi den e evento internacional di taekwondo yama Los Brujos del Taekwondo. Esaki den conexion cu e celebracion di e di 15 aniversario di dicho torneo. Mester bisa cu Aruba a wordo representa pa e atletanan Chiara y Sophia Petrocchi como tambe Angelo Rodirguez, mientras cu Theo Rodriguez a fungi como nan coach.

Durante di e competencia aki nos atletanan di taekwondo a midi forsa contra atletanan di paisnan fuerte manera Merca, US Virgen Island, México, Venezuela y Puerto Rico. Pa loke ta e resultadonan esaki tabata uno satisfactorio mirando cu tur tres atleta a logra subi e podium na Puerto Rico. Cada atleta a bringa dos pelea unda e atleta femenino Sophia Petrocchi a a gana su prome pelea 12 – 6 contra di Merca, mientras den e di dos pelea, Sophia a triunfa contra di Puerto Rico cu e score grandi di 24 – 3. Su ruman muhe Chiara Petrocchi a bringa contra di Puerto Rico y a gana 16 – 2 mientras cu den su dos pelea Chiara a gana cu e score di 10 – 6 contra di Merca. Notabel ta cu Chiara a bringa un combate di exhibicion contra Santo Domingo unda e la cay venci cu e score di 3 – 0 y keda cu e plata. Por ultimo e taekwondista masculino Angelo Rodriguez a gana tur dos su combatenan. Den su prome pelea e la vence su contrincante di Santo Domingo 14 – 1, mientras den su di dos pelea e la gana Puerto Rico 13 – 4. E federacion di taekwondo, ARTBO sigur por ta super orguyoso di su pupilonan.

Un danki sigur na Lotto, e Loteria di Aruba pa medio di Comision di Subsidio cu a subsidia e seleccion hubenil di taekwondo pa por a competi den e evento internacional di taekwondo na Guayama, Puerto Rico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.