Nunca antes landamento no a logra asina hopi medaya competiendo contra e miho landadonan hubenil di paisnan grandi manera Brasil, Argentina, Chile, Colombia, Venezuela, Bolivia y Peru. Es mas pa prome biaha den historia un landado Arubano a kibra un record di CONSANAT den persona di e hobencita Keeley Maduro kende a gana medaya di Oro den 50m mariposa kibrando e record di CONSANAT cu tempo di 29.13.
Despues di a permanece pa mas di 21 dia den exterior, nos seleccion nacional di landamento a regresa Aruba cu resultadonan mas cu satisfactorio obteni den dos diferente campeonato den nos region, prome durante di e Caribbean Swimming Championships, CARIFTA y awor e Campeonato Sudamericano, CONSANAT.
Un danki sigur na Lotto, e Loteria di Aruba pa medio di Comision di Subsidio cu a subsidia ambos biahe di e seleccion nacional di landamento di Aruba.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
