Oranjestad, Aruba - 22 di april, 2015: Nos atletanan infantil den e deporte di triatlon a haci un tremendo papel den e competencia di Ennia Kids Triatlon tene recientemente na e isla di Corsou. E cuater atletanan prometedor aki a sa na triunfa cu tres medaya di oro y un di brons den e tres categorianan disponibel . E seleccion infantil bou guia di coachnan Eights y Hill a haci un tremendo papel den tur tres disciplina, tanto den landamento, core bicicleta y core na pia nos atletanan a domina esakinan cu facilidad.

E atletanan cu a logra triunfa cu medaya di Oro tabata Chrisiaan Jansen kende a logra e prome luga den e categoria 6 - 8 aña. E hobencito Justin Morales tambe a logra un prome luga den e categoria di 9-11 aña, mientras e hobencito Giannon Eights tambe no a keda atras y logra triunfa cu un prome luga den e categoria di 12-14 aña. Aki tambe e hobencito Decan Tham a logra un di tres luga y un medaya di brons.

Un palabra di pabien sigur na e federacion di Aruba Triathlon Association como tambe na e coachnan Glennon Eights y Anthony Hill. Dentro di algun aña sigur nos lo tende mas di e cuater hobennan aki den e deporte di triatlon. Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atletanan infantil di triatlon pa e competencia di Ennia Kids Triatlon na Corsou.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.