Oranjestad, Aruba - 13 di april, 2015: Den e dianan nos dilanti lo tin e campeonato di Caribe Hubenil den e deporte di tennis di mesa, esaki lo tuma luga na e pais di Santo Domingo. Nos dushi isla di Aruba tambe lo sali cu un delegacion di hungadonan den e categoria masculino U-15.

E seleccion di Aruba den e categoria di U-15 ta consisti di e siguiente cuater hungadonan cu ta Donald Yarzagaray, Jeandry Mathilda, Jonathan Paredes y Chinho Cheng. Como coach lo fungi Rudy Raga. Un total di diesun pais a confirma pa participa na e campeonato hubenil di tenis di mesa. Na banda di Aruba nos tin tambe Puerto Rico, Trinidad and Tobago, Grenada, Corsow, Cuba, Haiti Guyana Frances, Guyana Ingles, Sint Lucia y Republica Dominicana.

E campeonato lo inicia diamars dia 21 di april y lo termina dialuna dia 27 di april. E ekipo hoben aki a hiba un preparacion debido mirando cu nan a entrena 3 ora tur dia di dialuna pa diadomingo. E federacion ta di tenis di mesa, ATTA a opta pa hiba un ekipo hoben y asina gana experiencia internacional unda lo enfrenta competidonan di paisnan fuerte den nos region. Ta importante pa apoya e desaroyo di nos atletanan di tenis di mesa.

Atrobe cada experiencia internacional lo haci nan un miho atleta. E hecho cu nan por competi y midi nan mes cu e otro paisnan den nos region ta bisa tur cos. E hobennan aki ta e futuro di Aruba y awor mester apoya nan pa asina nan sigui progresa den e deporte. Un danki sigur na Lotto, e Loteria di Aruba pa medio di Comision di Subsidio cu a subsidia e delegacion di tenis di mesa pa e campeonato di Caribe.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.