Oranjestad, Aruba - 7 di april, 2015: Un delegacion den e deporte di Atletismo a sali pa e isla Caribense di St. Kitts & Nevis unda e campeonato di Carifta Games 2014 lo ta tumando luga e dianan 3 – 6 di april. Federacion di Atletismo Aruba, a ricibi e sosten financiero di Fundacion Lotto pa Deporte pa realisa e biahe pa Carifta.

E cuater atletanan cu a haci e biahe tabata Julianne Dorothal, Willy Vrolijk, Lixandra Geerman y Toni-Lisa Brown, mientras como coach a biaha Augustien Dorothal y Wiwi Pina. Ya pa varios aña e delegacion di atletismo ta competi den e campeonato di CARIFTA cual ta esun mas grandi den henter Caribe. Aki nos atletanan ta midi forsa contra di e mihornan den Caribe pa loke ta e categoria hubenil. E competencia sigur ta uno fuerte mirando cu e deporte di atletismo a crece den forma impresionante e ultimo añanan.

E resultadonan obteni pa e mayoria islanan di Caribe den entre otro Weganan Panamericano y Weganan Olimpico ta papia pa nan mes, sigur paisnan manera Jamaica, Grenada, Trinidad & Tobago y Barbados. Den e ultimo añanan nos atletanan di Aruba ta logrando resultadonan satisfactorio den e competencia di CARIFTA, un muestra cu e federacion AAB ta trahando duro na bienestar di e deporte di atletismo na Aruba, specialmente bou di nos hobennan cu ta practicando esaki.

Un danki sigur na Lotto, e Loteria di Aruba pa medio di Comision di Subsidio cu a subsidia e delegacion di atletismo cu a sali pa e competencia di Carifta.