Oranjestad, Aruba – 26 di februari, 2015: Pa di 19 aña e organisacion di LIFIDA bou guia di su presidente sr. Jose Wever ta organisando e Torneo Internacional 18 di Maart Himno y Bandera cu e aña aki lo conta cu participacion di e paisnan Colombia, Venezuela, Corsow y mas cu claro Aruba.

Como parti di e preparacion di e seleccion, e organisacion di LIFIDA tin 11 luna ta yudando e seleccion U-13 ariba diferente tereno. Na banda cu e hungadonan a atende e campo di entrenamento, manera e LIFIDA Trainingskamp durante e vacacion escolar, nan a realisa den luna di december 2014, un biahe pa Corsow unda a enfrenta tres seleccion U-13 di Curacao Soccer Academy, unda a obtene un resultado positivo.

Preparacion di cada seleccion tin su costo cun’e y pa e motibo aki Lotto, e Loteria di Aruba cu pa medio di Comision di Subsidio a subsidia e preparacion di e seleccion U – 13 di LIFIDA en conexion cu e celebracion riba nos Dia Nacional Himno y Bandera.