Oranjestad, Aruba - 25 di februari, 2015: Diasabra 28 di februari y diadomingo 1 di maart proximo, e organisacion Velocity Cycling Team lo organisa e “1st Road Bike Race of the year 2015” cual lo consisti di un careda contra holoshi y un careda di ruta. E competencia lo ta pa atletanan di tur edad.

E circuito cu lo wordo cori riba dje ta esun di Malmok y ta uno di 6 kilometer y tambe conoci pa e demas participantenan. E careda contra holoshi lo wordo cori e diasabra mainta, mientras riba diadomingo tambe mainta lo tin e careda di ruta. E start y finish lo ta dilanti Aruba Beach Villas na Malmok. Lo core den e categorianan Expert, Sportive/Master Beginners y Kids. Mester corda cu e distancianan cori lo varia den e diferente categorianan. Mas cu claro lo tin premiacion pa cada careda separa y e ceremonia di premiacion ta tuma luga na final di e caredanan.

Un danki sigur na Lotto, E Loteria di Aruba pa medio di Comision di Subsidio cu a subsidia e prome competencia di ciclismo pa aña 2015 organisa pa Velocity Cycling Team.